第七天 08年4月13日關西中國四國九州

今日六點鬆D就起身啦~ 一早就落大浴場浸下~ 整好晒出發已經係 7.50啦!

來高知既目的就係打算去日本三大朝市~高知日曜朝市~ 

佢只會星期日先係最大規模有幾百檔檔口~ 檔口全長成千三米~

早上電車比較疏~ 電車都要轉車咖~ 搭多三四個站就去到縣廳前

搭一搭電車行幾分鐘去到高知城已經成 8.18分啦! 9.12火車去岡山得返40分鐘行朝市咋... 

高知城就咁影一影算啦!

8點幾已經好多人啦! 兩旁都是檔口

第一條街都是賣花, 生活雜物~ 日本人真係好中意種花~ 連樹苗都有得賣~

行左一個街口搵到我既目的啦~

睇雜誌見過話朝市有唔小野食~ 我就係比呢個吸引左來~

雖然唔知前面仲有咩食~ 但都係買左先啦~

呢檔主要就係得三樣野~ 雞肉,雞潤,雞肉丸~ 每樣一串成為190YEN

沿途仲有好多生果~ 有D都有得試食~ 價錢當然算係十分之平!!不過好多都都係賣緊土佐文日~ 好似西柚咁~ 超多! 仲有唔少蔬菜~ 比起超市佢地真係好平~ 基本上都係四國種咖~ 咁多樣我覺得最貴係蕃茄~ 有D好靚既真係賣到好貴~ 士多啤梨都有唔少~ 不過唔食羅...有D厭了...

一路行都見有唔少野食賣~ 不過唔係太岩我~ 係D壽司便當~ 日本糕點~ 大草餅!

我想食係D即刻整好既野食~ 見到檔好多人排隊既天婦羅~ 不過D牌無漢字~ 唔知咩打咩... 只係

 

買左個蕃薯天婦羅~ 110YEN

最後時間唔多啦~ 對面係一大檔串燒~ 有好多款式~~ 嘩太好啦!!

手指指一串一串咁叫~ 好多人企向檔前面食~ 我一共買左五串都係550YEN~ 

由於趕時間影完相即刻羅住D串燒一路行一路食啦~ 不過之後好後悔...因為D串燒好好食~ 真係好想食多幾串!!  買左牛肉, 豬肉, 雞腎, 雞肉, 雞皮~ 個豬肉牛肉又係十個好食~ 牛肉好淋無醃過~豬肉係爽口~ 好想再食呀! 最重要佢係我喜歡的鹽燒!!

                行完啦~走啦~要衝去車站啦!

仲有十五分鐘~ 行得超快去車站啦~ 順利上到車~ 要兩個多小時先去到岡山~ 

向車無野做就影下向朝市買左d 咩啦~ 

日日食咁多肉所以都買D青瓜蕃茄食下~ 青瓜100YEN 蕃茄200YEN~ 

橙色個應該係 桔仔200YEN... 可能我食唔到啦~ 拿嘴既...

唔知有咩活動好多人向天橋到行

11點幾返到岡山去酒店羅返個o急就要出發去名古屋啦!

12.28分車~ 未夠鐘就向車站行下d手信舖~ 不過無野睇岩!

120YEN 的寶礦力

兩小時去到名古屋啦~ 個天好黑呀! 又想落雨!

落車BOOK埋今晚車票上高山~ 我怕無位坐~

向車站搵 LOCKER 放好個o急 500yen 就搵巴士去名古屋城啦~ 名古屋D巴士好復雜! 

搵左好耐先搵到呢架觀光巴士仲要等佢有車! 200YEN 一程!

到左名古屋城時侯唔早啦! 15.50拿拿聲行去天守閣啦~ 入場費500YEN

名古屋城都好出名下~ 但我覺得佢唔算好靚~ 雖然比左入場費都無上去睇~

由於上過大阪城同松山城都唔入去睇啦~ 我諗差不多啦!

影張相就走啦~ 哈哈

向名古屋城見到有兩間麵店話係名古屋名物想食咖~ 不過收工啦~ 無得食!

個天開始落雨啦~ 咩觀光心情都無啦~ 就搭地鐵去榮站周圍行下~ 

本來打算行去電視塔同好似札幌既公園都無去到~  向附近行來行去搵鰻魚飯食!

向百貨公司入面見到~ 好靚好想買來食...但真係太貴! 30蚊個我怕味道好普通!

 跟地圖行左十幾分鐘終於搵到地圖上既鰻魚飯...我頂...放假...唉! 食咩好呀!!!

張 memory card error 左~ 名古屋已經無咩相有d相救唔返~ 之後去左行下D藥房~ 買左D野~ 經過個 Sunshine Sakae 商場既摩天輪 都幾靚~ 不過D相無左...SHIT!               

向條街到睇唔到有咩岩食就去返榮站既地下街~ 無意見到呢間有鰻魚飯食既松月!

叫左個 うな里鰻魚飯 1800YEN 仲叫多左個鰻魚蛋卷 1000YEN

第一次向日本食鰻魚飯~ D鰻魚切到好細件~ 每一件到脆仆仆~ 熱咖~ 

加埋軟綿綿既日本米同鰻魚汁~ 真係好好食! 鰻魚蛋是即時煎~ 

中間的蛋仍是半生熟~ 鰻魚不是脆的~ 加上蛋不是甜的我有D失望... 但其實都好食! 

兩個食完真係好飽~ 因為兩樣都好[流]

食飽飽都係18.30到~ 仲有一小時先差不多去搭車就搭返地鐵 200YEN 去返名古屋站行下高島屋同另一間百貨公司~ 都係行下野食個PART~ 向高島屋買左兩包蝦餅!

呢個小孩像立下眼我以為佢伸中指~ 哈哈

差不多夠鐘就去 LOCKER到 羅返個o急~

本來想向名古屋住一晚咖~ 但第二日上到高山成11點幾~ 都係夜晚搭火車好~ 

D雨越落越大啦~ 倒水咁...好彩上火車啦!

中途終於訓得著~ 訓左一個鐘到啦~ 起身差不多落車~ 22.07準時到達!
仲落緊大雨呀~ 不過都要行啦~ 好彩間酒店唔係好遠~ 好易搵到~ 行一陣就到!

好難得搵到呢間酒店單人近車站都係 4400YEN咁平~ 不過聽日係高山祭啦~ 無房加上好貴聽日要轉酒店~ 上到房見得閒 LOBBY 有兩部電腦用~ 今晚就洗衫啦! 

電腦仲可以插USB~ 我好叻羅定 CARD READER 去日本~ 睇下自己影D櫻花~ 

始終新機落地唔知自己影成點~

講返洗衫~ 200YEN 洗半小時~ 100YEN 乾衣半小時 洗左唔係好多野都要乾一小時!坐向 LOBBY 玩左個半鐘網真係咩都夠晒! 洗好晒差不多十二點沖亮訓覺啦~

戰利品張相係無左! 難得我今日有買野!! 可惡!